رباعيات الشاعر المصرى –احمد الهمامى
خـــــايب الـرجا والسعيد اتجمـعوا في يوم
واحـــــد ينُق ع التاني وواحد يقول مظلوم
خــــــايب الـــــــرجا قال للسعيد مــين قدك
رد السعيد وقــاله ع الشـقا ولا ع الهموم
وآه
* * *
كاســـات خــمور نزلت في جـوفى
خلتــــني أشعر بالغـلط يا كســوفى
إزاي قـدرت أخالف وأعصـى ربنا
وأنا اللي ياما منعت نفسي بخوفى
وآه
* * *
أبــواب وأبـــواب وبـوابين
وحجاب وحُجاب وحــجابين
واقــفين ما بينا يا حبــيبتي
ولا الـــــــعيون كــــــدابين
وآه
* * *
الدنيــــــــــا زي رقــاصه بتهـــز درابوكا
مره بـــــــــــترقص بلدي ومــره كـاريوكا
وإنتي يا دنيتي هــترقصي لمــين النهارده
للست ساميه جـــــمال ولا لتحيه كاريوكا
وآه
* * *
الميتين المدفونين تحـت التراب صحيوا قامـوا
فتحوا الترب خلعوا الكفن وعالأرض هـــامـوا
عرايا مشيوا يدوروا على أرضهم وأهـــــــلهم
عرايا عادوا بلا أرض بلا أهل ورجعوا نامــوا
وآه
* * *
هو اللي داق طعم الهوى هيـــــــــــــــعمل إيـــه
غير إنه يتحــول هـوا للــــــــــــــعبه في إيــديــه
وكأنه إنســــــــــــــــــان آلي ومعـــــدوم الإراده
بريــموت الشوق يجيبه ويحركه ويضحك عليه
وآه
* * *
فيه ناس حديثها كله هــزل
وناس لسانها بينقط غــزل
وأنا لا أحـب دُول ولا دُول
الجد يا محلاه ولوكان ملـل
وآه
* * *
يومي يمـر وأنا راضـي
ولو طلع الشبك فاضـي
صياد وبشكر ربنا دايماً
والحــمـد لله هـي زادي
وآه
* * *
فرعــــــــــون حــــكم البلاد بالخــــوف
أرجوك مــــــتقولش لأ وبــص شـــوف
موسى النبي لما دعاه للحق عمل إيه؟
غــير إنه لَمّ السَحَرَه حـواليه بالألوف
وآه
* * *
علم الصــــــــــراحه من أسهل علـــــوم الإنسانيه
من غــــــــــير دروس انوي ونتيـــجتك ميــه مـــيه
واللي يقولك الصراحه عالأرض ما تأكــلش عيش
قولــــــــــه نويت آكـــــل عســـل في الجــنه الهنيه
وآه
* * *
أنـا كانــــلي صـاحب معرفوش
سمـعت عـــــنه وما قابلــتوش
وكـــــــانلي قــدوه ومثل عـالي
عرفته عن قرب طلع فاشوش
وآه
* * *
قــــــــلوا الإنسان ده روحه مســـجونه في بـدن
ونفــــسه محبوسه في قلبه اللي جـــواه اتسجن
يعني البشر روح ونفس اتجمعوا وسكنوا البدن
طـــب ليه يعيشوا في سجن ويـموتوا في عـــفن
وآه
الثلاثاء 16 فبراير - 23:06
